Для міліцэйскага спецназа ў Налібацкай пушчы адловяць двух рысяў, занесеных у Чырвоную кнігу

Міністр лясной гаспадаркі Беларусі Міхаіл Амельяновіч дазволіў злавіць у Налібацкай пушчы двух рысяў для міліцэйскага спецназа, дзе летась памерла легендарная рысь — сімвал часці.



Пра паведаміў Sputnik начальнік аддзялення ідэалагічнай работы вайсковай часці 3214 унутраных войскаў МУС Беларусі маёр Аляксандр Бражыцкі.

Рысь, якая жыла на тэрыторыі вайсковай часці, памерла восенню 2016 года, жывёла больш за 15 гадоў была жывым сімвалам міліцэйскага спецназа. У драпежніцы не вытрымала сэрца ад тугі па памерламу сябру.

«Міністр (кіраўнік Мінлясгаса Міхаіл Амельяновіч ) даў дабро на тое, каб у Налібацкай пушчы злавілі для нас рысяў. Хацелася, каб гэта былі самец і самка», — паведаміў Бражыцкі.

Паводле яго слоў, дамоўленасці па гэтым пытанні дасягнуты, але аб тэрмінах, калі драпежнікаў пачнуць лавіць, казаць яшчэ рана. Бражыцкі растлумачыў, што вальер для драпежнікаў яшчэ не адрамантаваны.

«Мы вырашылі правесці поўную рэканструкцыю старой клеткі, у якой нашы рысі пражылі 15 гадоў. Цяпер будаўнічыя работы ў самым разгары, і калі будзе гатовая клетка, складана сказаць. Шукаем сродкі, будуем. Ужо прынятае рашэнне, што падлога ў ёй будзе бетоннай», — сказаў ён.

Пару рысяў часці ў пачатку 2000-х падарылі расійскія калегі. Рысь-самец апошнія два гады жыцця моцна хварэў, у яго быў радыкуліт, таму ён кульгаў. Жывёла памерла ў пачатку 2016 года, ва ўзросце 16 гадоў. Самка рысі пасля смерці свайго сябра пражыла нядоўга — менш за год.

Рысь занесеная ў Чырвоную кнігу Беларусі, у краіне жыве не больш за 500 гэтых жывёл, а ў Белавежскай пушчы — не больш за 20. Рысь з'яўляецца жывым сімвалам спецназа ўнутраных войскаў МУС, галава гэтай жывёлы намаляваная на шаўроне байцоў спецназа.

Наша Ніва

Фота: Mariusz Chilmon/flickr.com

http://nn.by/?c=ar&i=183570